የአነስተኛና መካከለኛ ኢንተርፕራይዝ ፋይናንስ ፕሮጀክት በተለይም በማኑፋክቸሪንግ በዘርፍ እድገት ላይ ቀጥተኛ ተጽዕኖ ከሚያሳድሩ ተግዳሮቶች ውስጥ ዋነኞቹ የካፒታል እጥረት፣ የቴክኖሎጂ እና የንግድ ስራ እውቀት ውሱንነት መሆኑን በመገንዘብ፤ በዋነኝነት ለአነስተኛና መካከለኛ ኢንተርፕራይዞች የፋይናንስ ተደራሽነት በማሳደግ ያለባቸውን የፋይናንስ እጥረት የመቅረፍና የንግድ ስራ አገልግሎት ስልጠናን የመስጠት ዋነኛ ዓላማን በመተለም የተነደፈ ነው፡፡

የፕሮጀክቱ ጽንሰ ሃሳብ የመነጨው እንደ አውሮፓውያን ዘመን አቆጣጠር በ2014 ዓ.ም በኢትዮጵያ አነስተኛና መካከለኛ ኢንተርፕራይዞች ፋይናንስ አቅርቦት ዙሪያ በዓለም ባንክ ከተደረገ ጥናት ሲሆን፣ ጥናቱ ጥቃቅን ኢንተርፕራይዞች በማይክሮ ፋይናንስ በኩል የብድር አቅርቦት ተጠቃሚ እንደሆኑና፣ ትላልቅ ኢንተርፕራይዞች ደግሞ በባንኮች በኩል የብድር አቅርቦት የሚያገኙ መሆናቸውን ይጠቁማል፡፡ በዚሁ መሰረት በመካከል የሚገኙ በጥናቱ “Missing middle’’ የሚል መጠሪያ የተሰጣቸው አነስተኛና መካከለኛ ኢንተርፕራይዞች የብድር አቅርቦት ችግር ያለባቸው መሆኑ ተለይቷል፡፡ በዚህ መነሻነት በጥናቱ እንደመፍትሄ ሃሳብ የቀረበው፤

ሀ. የማይክሮ ፋይናንሶችን አቅም በገንዘብና በስልጠና በማጎልበት የብድር አቅርቦት ስራቸውን ከፍተኛ የብድር ፍላጎት ወዳለበት ወደአነስተኛና መካከለኛ ኢንተርፕራይዞች ትኩረት እንዲያደርጉ ማድረግ፣

ለ. የንግድ ባንኮችም የብድር አሰጣጥ ፖሊሲያቸውን በመፈተሽ ከትላልቅ ኢንተርፕራይዞች የፋይናንስ ድጋፍ በተጨማሪ ዝቅ ብለው አነስተኛና መካከለኛ ኢንተርፕራይዞችን የመደገፍ አካሄድ ላይ እንዲያተኩሩ፤ ይህም አሰራራቸው አሁን ያለውን የአነስተኛና መካከለኛ ኢንተርፕራይዞች የብድር ፍላጎት መሰረት ያደረገ እንዲሆን ይጠቁማል፡፡

በዚህ ጥናት መነሻነት የአነስተኛና መካከለኛ ኢንተርፕራይዞች ፋይናንስ ፕሮጀክት የኢትዮጵያ መንግስትና የዓለም ባንክ ባደረጉት ስምምነት እውን ተደረገ፡፡ በዚህም መሰረት የብድር ውል ስምምነቱ በኢትዮጵያ መንግስትና በዓለም ባንክ መካከል እ.አ.አ ሰኔ 15 ቀን 2016 ዓ.ም ተፈረመ፡፡

ፕሮጀክቱ አራት ኮምፖነንቶች ሲኖሩት አንደኛው በኢትዮጵያ ልማት ባንክ የሚተገበር ሲሆን በኢትዮጵያ ኢንተርፕራይዝ ልማት /ኢኢል/ ስር የሚገኘው የፕሮጀክት ማስተባበሪያ ጽ/ቤቱ የሁለተኛውን፣ ሦስተኛውንና አራተኛውን ክፍሎች አጠቃላይ የማስተባበር ሚናና ቀጥተኛ የትግበራን ኃላፊነት አለበት።